Bláa lónið besta náttúrulega heilsulind í heimi

Það voru lesendur breska ferðatímaritsins Condé Nast Traveller, sem gáfu Bláa Lóninu -heilsulind hæstu einkunn í flokknum besta náttúrulega heilsulindin í heimi. (medical/thermal spa). Á listanum eru ýmsar aðrar þekktar heilsulindir, eins og Royal Park Evian Í Frakklandi og Clinique La Prairie í Sviss.
 
Þetta er í annað skipti sem verðlaunin eru veitt, en í fyrra varð Bláa Lónið í áttunda sæti.
Þetta mikla stökk er staðfesting á því að Bláa Lónið hefur unnið sér sess sem einstök heilsulind á heimsmælikvarða, en lesendur gáfu Bláa Lóninu einmitt hæstu einkunn fyrir einstaka upplifun í einstöku náttúrulegu umhverfi. Þá hefur þróun nuddmeðferða ofan í lóninu og þróun á Blue Lagoon Iceland húðvörum einnig átt sinn þátt í að auka heildarupplifun gesta Bláa Lónsins - heilsulindar. 

Magnea Guðmundsdóttir, markaðsstjóri Bláa Lónsins hf sagði viðurkenninguna vera mikla hvatningu fyrir fyrirtækið og starfsfólks þess og ásamt því að vera góður vitnisburður um það hversu þekkt Bláa Lónið – heilsulind er orðin.
 
Tímaritið Condé Nast Traveller er eitt virtasta ferðatímarit í heimi og tilheyrir hinni þekktu tímaritaútgáfu Condé Nast Magaine, sem gefur meðal annars út tímaritin Vogue, Glamour og Vanity Fair.
 
Verðlaunin voru afhent við hátíðlega athöfn á Mandarin Oriental Hyde Park í London, mánudaginn 24. janúar