Bláa Lónið – heilsulind vinsæl meðal íbúa á Suðurnesjum
Eins og fram hefur komið í Víkurfréttum eru Grindavík og Bláa Lónið – heilsulind á meðal mest spennandi staða í heiminum að mati lesenda vefsíðunnar Askmen.comVíkurfréttir tóku Magneu Guðmundsdóttur, kynningarstjóra Bláa Lónsins, tali og spurðu út í stöðu Bláa Lónsins og væntingar fyrir sumarið.
Hversu þekkt og vinsælt er Bláa Lónið?
Í raun er BLUE LAGOON ICELAND eitt af þekktustu vörumerkjum Íslands ásamt Icelandair og Björk. Aðsóknartölur okkar sýna að um 70% allra erlendra gesta sem sækja Ísland heim heimsækja heilsulindina, en hlutfall ferðamanna sem leggja leið sína til okkar hefur aukist síðustu ár. Segja má að Bláa Lónið sé í raun jafn táknrænt fyrir Ísland og Eiffel-turninn fyrir París og Frelsistyttan fyrir New York.
Er Bláa Lónið alltaf jafn vinsælt meðal Íslendinga?
Aðsókn Íslendinga er nokkuð jöfn og skiptir okkur miklu máli. Íslendingar eru um þriðjungur gesta okkarog skv. könnunum þá hefur tæplega helmingur þjóðarinnar heimsótt heilsulindina. Suðurnesjamenn standa sig best, en 65-70% þeirra hafa komið í Bláa Lónið. Það er athyglisvert að fleiri íbúar Reykjanesbæjar en Grindavíkur hafa heimsótt heilsulindina, en niðurstöður kannana sýna að 70% íbúa í Reykjanesbæ hafa komið í Bláa Lónið til samanburðar 65% íbúa Grindavíkur. Við hjá Bláa Lóninu skorum vitanlega á Grindvíkinga að jafna metin við nágrannabæjarfélagið!
Hvernig leggst svo sumarið í þig?
Sumarið er alltaf fjörugt hjá okkur og við hlökkum mikið til að taka á móti bæði erlendum og innlendum gestum. Þess má geta að á Uppstigningardag munum við í samvinnu við Kjörís bjóða öllum börnum upp á ís og vonumst til að sjá sem flesta Suðurnesjamenn hjá okkur.
