Bláa Lónið - Heilsulind 5 ára

Fimmtudaginn 15. júlí verða 5 ár liðin frá því Bláa Lónið – heilsulind var formlega opnuð.  Í tilefni þess verða fjölbreytt afmælistilboð í boði fyrir gesti heilsulindar. Á afmælisdaginn gefst gestum heilsulindar að prófa herðanudd þeim að kostnaðarlausu frá klukkan 10 til 20.
Sérstök afmælistilboð verða einnig í boði s.s. kísilnudd og aðgang að heilsulind; aðgang fyrir tvo í heilsulind og 20 mínútna slökunarnudd ásamt tilboði sem hentar vel fyrir fjölskylduna.

Að auki fá þeir sem versla afmælispakka afhenta miða sem veita 20% afslátt af matseðli á veitingastað. Þá verður tilboð á Blue Lagoon húðvörum í verslun. Allir þeir sem kaupa afmælistilboð fara í pott þar sem þeir eiga kost á að vinna dekurdag í Bláa Lóninu – heilsulind.

Markviss uppbygging og vöruþróun hefur átt sér stað frá því heilsulindin opnaði í júlí 1999.  Um mitt sumar 2003 var viðbót sem felst í fossi sem í rennur Blue Lagoon jarðsjór, eimbaði, sauna og sérhönnuðu svæði fyrir nudd- og líkamsmeðferðir tekið í notkun.

Fjölbreytt úrval af Blue Lagoon nuddi og spa meðferðum hafa einnig verið þróaðar. Nuddið og meðferðirnar fara fram í Bláa Lóninu, undir berum himni. Virk efni jarðsjávarins sem eru steinefni, kísill og þörungur gegna mikilvægu hlutverki í meðferðunum. Meðal þeirra meðferða sem njóta hvað mestra vinsælda eru kísilnudd, saltskrúbb og nærandi og slakandi þörungameðferð. Spa svæðið, sem er hluti af lónssvæðinu, er rúmgott og fleiri en ein meðferð getur farið fram í einu.