Björgunarsveitin Þorbjörn í Grindavík fagnar 90 ára afmæli

Fannar Jónasson, bæjarstjóri Grindavíkurbæjar, afhenti formanni og varaformanni Björgunarsveitarinnar Þorbjarnar veglegan blómvönd í tilefni 90 ára afmæli hennar. Á þessum óvenjulegu tímum var lítið um veisluhöld í tilefni þess. Ýmislegt hafði þó verið í undirbúningi sem mun bíða betri tíma þegar takmarkanir vegna sóttvarna verður aflétt.

Þeir Bogi Adolfsson, formaður Slysavarnadeildarinnar, og Helgi Einarsson, varaformaður, hafa báðir unnið í fjölda ára innan deildarinnar. Þeir voru sammála um að vinnan í þágu deildarinnar væri áhugamál og lítil kvöð þó það hafi alveg komið upp í kollinn þeirra hvers vegna þeir væru hreinlega að þessu. Alltaf myndi félagsskapurinn og það að vinna í þágu samfélagsins með þessum hætti drífa þá áfram. Það væri virkilega gaman að starfa innan deildarinnar og félagsskapurinn þar sé mjög góður.

Á spjalli við þá félaga barst í tal fyrsta strandið sem sveitin kom að en hún vann mikið björgunarafrek þegar sveitin bjargaði 38 manna áhöfn af CAP FAGNET þegar það strandaði við Hraun í mars 1931. Var þá fluglínutækið notað í fyrsta sinn við björgun hér á landi. Það sem margir kannski ekki vita er að bæði skrúfa og varaskrúfa skipsins eru staðsettar fyrir framan hús deildarinnar en þeim var náð á land eftir um áttatíu ár í sjónum. Þar má sjá hvernig skrúfan hefur farið þegar bátinn rak upp í fjöruna. Þar má líka finna ankerið en það kom fyrr á land en aðalskrúfan, segir á heimasíðu Grindavíkurbæjar.