Björgunarsveit aðstoðar bíleiganda við Ísólfsskála

Síðdegis í gær óskaði lögreglan í Keflavík eftir aðstoð Björgunarsveitarinnar Þorbjörns í Grindavík vegna bifreiðar sem ekið hafði út af Ísólfsskálavegi, í hrauninu skammt austan við Ísólfsskála.  Ekki var vitað um hvernig bifreið var að ræða en vitað var að vegfarandi á jeppa hafði reynt að aðstoða fólkið án árangurs.  Var því ákveðið að senda bæði Patrol jeppa og MAN trukk sveitarinnar á vettvang.  Í ljós kom að um var að ræða fólksbifreið og sluppu ökumaður og farþegar ómeiddir.  Vel gekk að draga bifreiðina upp á veg með spilinu á Patrol jeppanum.  Bifreiðin var nokkuð skemmd og aðstoðuð björgunarmenn fólkið að gera hana ökuhæfa að nýju og fylgdu síðan fólkinu til Grindavíkur.