Björg tekur við af Þorsteini í Grindavík

Björg Erlingsdóttir hefur verið ráðin sviðstjóri frístunda- og menningarsviðs hjá Grindavíkurbæ. Hún tekur við starfinu af Þorsteini Gunnarssyni, sem á dögunum var ráðinn sveitarstjóri Skútustaðahrepps.

Björg fæddist í Reykjavík árið 1970 og ólst upp á Akureyri frá 1973. Hún er stúdent frá Menntaskólanum á Akureyri og er með BA-próf í þjóðfræði frá Háskóla Íslands og master ásamt sérnámi í safnafræðum frá háskólanum í Lundi í Svíþjóð. Þá er hún einnig með diplómapróf MPA frá HÍ í opinberri stjórnsýslu. 
Björg hefur undanfarin ár verið sviðsstjóri miðlunarsviðs Listasafns Íslands en áður var hún í sjö ár á Höfn í Hornafirði sem forstöðumaður Menningarmiðstöðvar Hornafjarðar, framkvæmdastjóri Jöklasýningar og Jöklaseturs, auk þess að vera einn af framkvæmdastjórum sveitarfélagsins. Menningarmál, atvinnumál, ferðaþjónusta og félagsmiðstöð heyrðu undir hennar starf fyrir austan. 

Á vef Grindavíkurbæjar segir að ljóst sé að í Björgu fái bæjarfélagið í sínar raðir öflugan starfsmann með fjölbreyttan bakgrunn á menningar- og stjórnsýslusviði.