Bjóða viðskiptavinum að skipta út plastpokum fyrir fjölnota poka

Samkaup hefur ákveðið að bjóða vi​ðskiptavinum sínum að koma með plastpoka í allar verslanir fyrirtækisins og skipta þeim út fyrir fjölnota poka. Átakið fer af stað í dag og verður áberandi í verslunum um land allt.

„Við höfum tekið upp 50.000 fjölnota poka og komið upp sérstökum móttökustöðvum í verslunum okkar. Með því viljum hvetja fólk til að koma með plastpoka til okkar. Fyrir hverja þrjá plastpoka sem fólk skilar inn í verslanir okkar, fær viðkomandi einn fjölnota poka. Við sjáum svo að sjálfsögðu til þess að plastpokarnir fari á réttan stað, beint í endurvinnslu. Með þessu viljum leggja okkar að mörkum við að draga almennt úr notkun plastpoka,“ segir Gunnar Egill Sigurðsson, framkvæmdastjóri verslunarsviðs Samkaupa.

Fjölnota pokarnir munu fást í skiptum fyrir plastpoka meðan birgðir endast. „Í framhaldinu munum við svo hafa fjölnota pokana okkar til sölu og ágóði þeirra rennur í samfélagssjóð Samkaupa sem árlega er nýttur í að styðja við góð málefni.“

Gunnar Egill segir að hugmyndin hafi raunverulega kviknað í kjölfar strandhreinsiátaks sem Nettó hefur unnið í samstarfi við Bláa herinn og Samtök Sveitarfélaga á Suðurnesjum í sumar. „Þar voru strendurnar á Reykjanesi gengnar og rusl tekið upp úr fjörunni. Okkur ofbauð hreinlega magnið. Bara í sumar söfnuðust yfir sex tonn. Við viljum með þessum aðgerðum axla ábyrgð á vandamálinu sem útbreiðsla plastpoka raunverulega er. Það getur til að mynda tekið á bilinu 100 til 500 ár fyrir hefðbundna plastpoka að brotna niður í náttúrunni. Við erum í góðri aðstöðu til þess að reyna að breyta þessu með viðskiptavinum okkar og þess vegna förum við af stað í þetta verkefni núna,“ segir Gunnar Egill.

Samkaup dró úr sorpi frá verslunum um 100 tonn í fyrra og er nú þegar komin langleiðina með sama markmið í ár. Gunnar segir fyrirtækið ætla að halda áfram að sýna gott fordæmi í umhverfisvernd og vill með þessu hvetja enn fleiri verslanir til að gera slíkt hið sama.

Fjölnota pokarnir sem Nettó býður viðskiptavinum sínum í skiptum við þrjá plastpoka