Bílaleigubílar torvelda umferð um göngu- og hjólastíg

Ítrekað er bílaleigubílum lagt á göngu- og hjólastíg sem liggur milli Iðavalla og Flugvalla í Reykjanesbæ. Bílarnir hindra eðlilega umferð um stíginn sem margir nota á ferðum sínum milli bæjarhluta. Nokkrar bílaleigur eru með starfsemi á lóðum sem liggja að stígnum.

Guðlaugur Helgi Sigurjónsson, sviðsstjóri umhverfissviðs Reykjanesbæjar, segir í samtali við Víkurfréttir að hann hafi margoft rætt við eigendur þessara bílaleiga en svo virðist sem það nái ekki til starfamannanna sem þar starfa. Á næstunni verður gerð rassía í því að hreinsa göngu- og hjólastíginn af þeim bílum sem lagt er á hann.