Bíða út vikuna með að auglýsa eftir hjúkrunarfræðingum

Stjórnendur Heilbrigðisstofnunar Suðurnesja, HSS, ætla að bíða út vikuna með að auglýsa eftir hjúkrunarfræðingum til starfa hjá stofnuninni. Fimmtán hjúkrunarfræðingar sögðu upp störfum sínum í sumar í kjarabaráttu.

Halldór Jónsson, forstjóri Heilbrigðisstofnunar Suðurnesja, sagði í samtali við Víkurfréttir að sl. föstudag hafi ein af þessum fimmtán uppsögnum verið dregin til baka. Eftir standa því 14 hjúkrunarfræðingar sem hafa sagt upp störfum við stofnunina.

Í samtali við Víkurfréttir sagði Halldór að hjúkrunarfræðingar væru þessa dagana að kynna sér kjör sín í kjölfar úrskurðar kjaradóms. Þessi vika fengi því að líða áður en ráðist yrði í að auglýsa lausar stöður á HSS.