Bíða spennt eftir að hraunið renni yfir skurðinn

Grafinn hefur verið skurður í mynni Nátthaga og í hann lagðar lagnir, rör og ýmsar tegundir af einangrunar- eða fylliefnum. Landsnet hefur fengið afnot af öðrum enda skurðsins og í hann er settur strengsandur og hann þjappaður eftir kúnstarinnar reglum. Hitamælar settir í skurðinn og svo er fyllt upp í hann.

„Svo bíðum við spennt og vonumst til þess að hraunið renni yfir skurðinn. Heppnist þessi tilraun vonumst við til þess að eignast mæliniðurstöður sem telja má einstakar á heimsvísu og verða mjög mikilvægt innlegg í vitneskju um áhrif hraunflæðis á jarðstrengi og aðra innviði sem grafnir eru í jörðu,“ segir í færslu Landsnets á Facebook. Þar segist fyrirtækið bíða spennt eftir að hraun renni yfir skurðinn en fyrirtækið er þátttakandi í spennandi verkefni í Nátthaga við gosstöðvarnar í Fagradalsfjalli. Verkefnið snýst um að freista þess að mæla áhrif hraunrennslis á lagnir í jörðu.

Aðilar sem koma að þessu verkefni eru Almannavarnadeild ríkislögreglustjóra, Jarðvísindastofnun Háskólans, Veðurstofa Íslands, Landsvirkjun, Neyðarlínan 112, Verkís, Verkfræðistofa EFLA, Míla, Gagnaveitan, Tensor, Rafholt ofl.