BERGUR VIGFÚS GK 53 SELDUR
Barðsnes ehf., sem er í eigu Síldarvinnslunnar í Neskaupsstað og KEA, hefur að undanförnu staðið í viðræðum við eigendur Bergs Vigfúss GK 53 um kaup á skipinu með tveimur síldarkvótum og veiðileyfi skipsins í norsk-íslenska síldarstofninum. Frétt um þetta birtist í síðasta tölublaði Fiskifrétta. Bergur Vigfús GK hét áður Keflvíkingur KE. Skipið er 35 ára gamalt og alls 280 brúttórúmlestir að stærð. Skipið hefur verið í eigu Njáls ehf. í Garði undanfarin ár og hefur m.a. verið gert út til netaveiða auk þess sem það hefur tekið þátt í veiðum á norsk-íslensku síldinni. Kaupverð með síldarkvótum og veiðileyfi í norsk-íslensku síldinni liggur ekki fyrir en samkvæmt heimildum blaðsins verður hluti kaupverðsins greiddur með hlutabréfum í Barðsnesi ehf. Það fyrirtæki gerir nú út nótaveiðiskipið Birting NK og starfrækir fiskimjölsverksmiðju í Sandgerði sem áður var í eigu Njarðar hf.
