Bergið í bleiku

Bergið var lýst í bleikum bjarma í gærkvöldi, en uppákoman er hluti af vitundarátaki Krabbameinsfélagins um brjóstakrabbamein. Þetta er sjötta árið í röð sem átakið er, en þar er frætt um sjúkdóminn og konur hvattar til að nýta sér boð Leitarstöðvar Krabbameinsfélagsins um röntgenmyndatöku. Þetta er hluti af alþjóðlegu árveknisátaki, að frumkvæði Estée Lauder, en bleik slaufa en tákn átaksins.

Bleik lýsing er einnig sýnileg annars staðar á landinu í byrjun október, fyrsta má telja Bessastaði en bleik lýsing verður einni m.a. á Selfossi, Akranesi, Ísafirði, og á Austfjörðum. Með hliðstæðum hætti verða lýst upp tvö hundruð mannvirki í fjörutíu löndum í tilefni átaksins, meðal annars Empire State í New York, Niagara fossarnir og Harrod’s í London.

Í rúmlega þrjátíu verslunum hér á landi sem selja vörur frá Estée Lauder verða boðnar bleikar slaufur til sölu og þar verður tekið við frjálsum framlögum í sérmerkta söfnunarbauka. Öllum ágóða af sölunni verður varið til verkefna sem valin verða í samráði við Krabbameinsfélagið og Samhjálp kvenna, sem eru samtök kvenna sem greinst hafa með krabbamein í brjóstum.

KB banki leggur brjóstakrabbameinsátakinu einnig lið. Á öllum afgreiðslustöðum bankans verða seldar bleikar slaufur og tekið við frjálsum framlögum í söfnunarbauka.

Ár hvert greinast 160-170 íslenskar konur með brjóstakrabbamein, þar af er nær helmingurinn á aldrinum frá 30 til 60 ára. Fjöldi nýrra tilfella hefur verið að aukast en lífshorfurnar hafa einnig batnað mikið. Um helmingur kvenna sem greindust með brjóstakrabbamein fyrir fjörutíu árum lifðu í fimm ár eða lengur en nú geta um 80% vænst þess að lifa svo lengi. Nú eru á lífi tæplega 1900 konur sem fengið hafa brjóstakrabbamein. Samkvæmt útreikningum frá Krabbameinsskránni getur tíunda hver kona búist við að fá brjóstakrabbamein.

Hér á landi eru konur boðaðar til brjóstamyndatöku annað hvert ár á aldrinum frá 40 til 69 ára. Erlendar rannsóknir benda til þess að með því að taka röntgenmyndir reglulega af brjóstum kvenna megi lækka dánartíðni vegna krabbameins í brjóstum verulega.