Baujan frá Sandgerði strandaði á Garðskagaflös
– sótt á rússneskum ofurtrukki Ægismanna
Innsiglingarbauja frá Sandgerði slitnaði upp eftir að siglt var á hana í gær. Baujuna tók þá að reka, þar til hún strandaði á Garðskagaflös í gærkvöldi.
Björgunarsveitin Ægir í Garði var kölluð til og fór hún á rússneskum ofurtrukki sveitarinnar í Garðskagaflösina í morgun. Ljósabúnaður var skrúfaður af baujunni og hún síðan dregin upp í fjöruna við gamla vitann á Garðskaga. Þangað kemur svo bíll með krana og sækir baujuna og kemur henni til Sandgerðis.
Meðfylgjandi myndir tóku félagar í Björgunarsveitinni Ægi nú í morgun af björgunaraðgerðum.
VF-myndir: Baldvin Þór Bergþórsson
