Barnshafandi kona reyndi fíkniefnasmygl um Keflavíkurflugvöll

Barnshafandi kona reyndi að smygla rúmlega 5000 e-pillum til landsins í gær. Þetta er eitt mesta magn e-pilla sem Tollgæslan á Keflavíkurflugvelli hefur lagt hald á og ætlað var á markað hérlendis. RÚV greindi frá þessu í kvöld.
Tollgæslan á Keflavíkurflugvelli fann rúmlega 5.000 e-pillur á barnshafandi konu frá Sierra Leone í gær. Þetta er eitt mesta magn e-pilla sem tollgæslan hefur lagt hald á og ætlað var á innanlandsmarkað. Konan var í dag úrskurðuð í tveggja vikna gæsluvarðhald.
Konan kom hingað til lands í gær frá París. Við gegnumlýsingu á farangri hennar vöknuðu grunsemdir um að ekki væri allt með felldu en pillurnar voru faldar í fóðri pokans og saumað fyrir þannig að töflunar hefðu ekki komið í ljós þótt pokinn væri opnaður.
Konan, sem er barnshafandi og komin fimm mánuði á leið, var í dag úrskurðuð í tveggja vikna gæsluvarðhald í héraðsdómi Reykjaness. Lögreglan á Keflavíkurflugvelli fer með rannsókn málsins og er hún á frumstigi.
Talið er að götuverðmæti efnanna sé um 10 miljónir króna.
Jóhann R. Benediktsson, sýslumaður á Keflavíkurflugvelli, segir að þetta mál sýni að menn svífist einskis til að smygla eiturlyfjum hingað til lands.
Pillurnar sem fundust í gær er eitt mesta magn e-pilla sem Tollgæslan á Keflavíkurflugvelli hefur fundið á einni og sömu manneskjunni. Aðeins einu sinni áður hefur álíka magn fundist sem ætlað var á markað hér á landi en það var fyrir tveimur árum. Til samanburðar fundust 2.200 e-pillur á Kio Briggs, en mál hans vakti mikla athygli hér á landi árið 2000.
Þá var einn maður úrskurðaður í tveggja vikna gæsluvarðhald í Héraðsdómi Reykjavíkur í gær vegna aðildar að innflutningi á einu kílói af kókaíni og einu kílói af heróíni, sem Tollgæslan á Keflavíkurflugvelli lagði hald á fyrir um tveimur vikum. Alls sitja því tveir í gæsluvarðhaldi vegna þessa máls, segir á vef Ríkisútvarpsins.