Barnaperrinn hefur áður verið kærður

Pólverjinn, sem handtekinn var í gær í fyrir að leita á ungar stúlkur í Sundmiðstöðinni, var fyrst kærður þann 24. janúar síðastliðinn, að sögn móður stúlku sem hann leitaði á.  Það atvik átti sér einnig stað í Sundmiðstöðinni. 
Lögregla verst allra frétta af málinu en Eyjólfur Kristjánsson, fulltrúi, staðfesti í samtali við VF að maðurinn væri ekki í haldi. Hann staðfesti að kærur væru farnar að berast vegna mannsins. Eyjólfur segir málið í rannsókn en vildi að öðru leyti ekkert segja að svo stöddu.

Jón Jóhannson, forstöðumaður Sundhallarinnar, staðfestir að kvartanir hafi áður borist vegna slíks atviks en ekki sé vitað að svo stöddu hvort um sama mann er að ræða. Sökum þeirra kvartana hafi eftirlit verið hert í sundlauginni.
Jón segir starfsfólk sundmiðstöðvarinnar vinna eftir sérstakri viðbragðsáætlun í tilvikum sem þessum og miði hún fyrst og fremst að því að vernda börnin þær mínútur sem beðið er aðkomu lögreglu. Hann segir lögreglu hafa brugðist skjótt við í gær, foreldrum hafi verið gert viðvart strax og skýrslur teknar.