Barnaníðingurinn ekki búsettur í Reykjanesbæ

Ágúst Magnússon, dæmdur barnaníðingur, mun ekki vera búsettur í Reykjanesbæ. Hann mun vera með dvalarstað á höfuðborgarsvæðinu, samkvæmt frétt á Vísir.is nú áðan. Víkurfréttir greindu frá því í gærkvöldi að Ágúst hafi sést á ferðinni í Reykjanesbæ, þar sem hann m.a. lagði bifreið sinni á Hafnargötu. Sást hann skömmu síðar á göngu nálægt Tónlistarskóla Reykjanesbæjar.

Í frétt Vísis.is er rætt við Brynju Árnadóttur, skólastjóra Myllubakkaskóla og Hjördísi Árnadóttur, félagsmálastjóra Reykjanesbæjar.

„Ég hef heyrt þessar fréttir eins og aðrir. Það er ekkert einsdæmi að þegar menn koma úr afplánun og aftur út í samfélagið að það verði ákveðin viðbrögð, sem ég tel eðlilegt," segir Hjördís Árnadóttir við Vísi.is, og segir mikilvægt að foreldrar séu vakandi.

„Ég skil það að foreldrar vilji vera á verði og vonandi eru þeir það alltaf," segir Hjördís sem ekki hafði fengið neina ábendingu frá foreldrum vegna Ágústs í dag.

Lögreglunni í Reykjanesbæ hafði í morgun ekki borist neinar formlegar kvartanir vegna ferða mannsins en var kunnugt um málið.

Fréttin á Vísi.is