Barði hús utan með leiðiskrossi

17 ára drengur var tekinn höndum í nótt þar sem hann barði hús við Hátún í Reykjanesbæ utan með leiðiskrossi.  Hann reyndist ölvaður og hafði tekið krossinn af leiði í kirkjugarðinum við Aðalgötu þar sem hann hafði einnig unnið skemmdir á 13 ljósaskreytingum við önnur leiði og brotið rúðu í nýja kirkjugarðshúsinu. Hann var færður í fangageymslur og yfirheyrður í dag.

Annars var nóttin nokkuð erilsöm hjá lögreglu þar sem m.a. var kvartað yfir unglingum sem voru að sprengja flugelda víðs vegar um bæinn fram á nótt.

Einnig réðist ölvaður viðskiptavinur eins skemmtistaðar í Reykjanesbæ á dyravörð með flösku að vopni. Hann sló dyravörðinn tvisvar í höfuðið, en flaskan brotnaði ekki. Hlutust af talsverðar bólgur.

Einn ökumaður var tekinn fyrir meintan ölvunarakstur í Grindavík í nótt og annar réttindalaus.

Loks var bifreið stórskemmd við Mávabraut í Reykjanesbæ í nótt. Rúður höfðu verið brotnar og virðist sem hoppað hafði verið á henni.

VF-mynd/Þorgils - Frá kirkjugarðinum