Banamein Danans heilablæðing

Dánarmein Fleming Tolstrup, danska hermannsins sem lést á Traffic um helgina, var heilablæðing vegna höggs sem hann hlaut á kjálka. Þetta kom fram við bráðabirgðarniðurstöðu krufningar sem fór fram á Landspítala Háskólasjúkrahúsi í gær.

Samkvæmt upplýsingum frá rannsóknardeild Lögreglunnar í Keflavík er rannsókn málsins lokið að mestu leyti og hinum grunaða hefur verið sleppt úr haldi. Töluverður tími mun þó líða þar til kæra verður lögð fram enda á enn eftir að ljúka ýmsum þáttum rannsóknar. Jafnvel er talið að 1-2 mánuðir geti liðið fram að því.

Samkvæmt frétt á Vísi.is er fjölskylda Tolstrups komin til landsins til að flytja lík hans til Danmerkur.