Bætt skipulag í slysa- og bráðamóttöku HSS

Frá og með 9. október n.k. verður tekið upp bætt fyrirkomulag í móttöku bráðveikra og slasaðra á Heilbrigðisstofnun Suðurnesja frá kl. 08 – 16.  Læknum í móttöku verður fjölgað þannig að alltaf verða til staðar auk heilsugæslulæknis, skurðlæknir og lyflæknir.  Hjúkrunarfræðingur mun taka á móti öllum sem þurfa á bráðri móttöku að halda og meta hvaða þjónustu viðkomandi þarf.  Þar að auki mun barnalæknir vinna í tengslum við bráðamóttökuna.
Þetta kemur fram í fréttatilkynningu sem HSS sendi frá sér í dag.

Þar segir einnig að boðið verði upp á hraðmóttöku heilsugæslulæknis í ákveðnum tilfellum þar sem skjótrar úrlausnar þarfnast. 
Eftir sem áður er gert ráð fyrir að einstaklingur hafi fyrst samband við móttökuritara í afgreiðslu sem tekur við greiðslu skv. gjaldskrá Tryggingastofnunar ríkisins. 
Best og ódýrast er að panta sér tíma hjá heilsugæslulæknum.  Búist er við að biðtími muni styttast verulega á næstu vikum með bættri mönnun, segir í tilkynningunni.
Þar kemur fram að vaktmóttaka er til staðar milli kl. 16 – 20 alla virka daga og milli kl. 10 – 13 og milli kl. 17 – 19 um helgar og hátíðisdaga.
Neyðarmóttaka er opin alla daga, allan sólarhringinn á HSS.