Bætt rekstrarafkoma Garðs
Rekstarafkoma sveitarfélagsins Garðs batnaði mikið á milli ára en fram kemur í ársreikningum fyir árið 2004 að rekstrarniðurstaða hafi verið nánast á jöfnu, eða neikvæð um 132.000 kónur og er þetta bati upp á 51 milljónir frá árinu 2003.Sigurður Jónsson, bæjarstjóri, sagði í samtali við Víkurfréttir að þennan bata mætti þakka aðhaldi í rekstri, en gjöld hafa staðið í staðá milli ára á meðan tekjur hafa aukist. „Við erum á réttri leið og verðum í góðum málum ef við höldum þessu striki.“
Bæjarfulltrúar F-listans lögðu fram eftirfarandi bókun á bæjarstjórnarfundi þar sem ársreikningur Garðs árið 2004 var afgreiddur:
Bæjarfulltrúar F-listans fagna góðri niðurstöðu, sem náðist í rekstri sveitarfélagsins á árinu 2004.
Á árinu hækkuðu tekjur um 11%,en það sem mest er um vert er að rekstrargjöldin standa í stað milli ára og reksturinn er kominn í jafnvægi úr verulegu tapi á árinu 2003. Bati á rekstri bæjarfélagsins nemur 51 milljón króna milli ára.
Í rekstur málaflokka fóru 88,68% af rekstrartekjum, sambærileg tala á árinu 2003 var 98,51% svo batinn er verulegur.
Veltufjárhlutfallið breytist úr 1,25 í 1,75, sem er mjög ásættanlegt.
Skuldir hækka á milli ára um 84 þúsund á íbúa en móti hækka eignir um 99 þús. á íbúa.
Skuldir bæjarsjóðs nema nú kr. 505 þús. á íbúa en skuldir samstæðunnar allrar nema um 670 þús. á íbúa. Á móti kemur að eignarstaða bæjarfélagsins er mjög góð eða 1,5 milljarður króna, sem er 1.097 þús. á íbúa.
Bæjarstjórn Garðs hefur einróma verið á þeirri skoðun að ekki beri að selja fasteignir sveitarfélagsins þótt með því móti væri hægt að sýna lægri skuldir á hvern íbúa bókhaldslega, en áfram stæði skuldbinding til næstu áratuga um greiðslu húsaleigu. Það er mat bæjarstjórnar að þegar til lengri tíma er litið sé mun hagstæðara að sveitarfélagið eigi sínar eignir sjálft fremur en selja þær fasteignafélagi.
Bæjarfélagið hefur á síðustu árum staðið í miklum framkvæmdum og stendur enn í stórframkvæmdum. Allt kallar þetta á veruleg útgjöld. Sú stefna bæjarfélagins að standa í miklum framkvæmdum ásamt framboði af ódýrum byggingalóðum hefur skilað sér í mikilli fjölgun íbúðabygginga ásamt að íbúum bæjarins fjölgar ört. Bæjarstjórn hefur sem betur fer staðið einhuga að þessari stefnu og hefur mikinn metnað til að byggja upp þetta góða samfélag okkar. Framtíð Garðsins er björt og Garðurinn á að hafa alla burði til að standa sig áfram sem sjálfstætt sveitarfélag.
Forseti Bæjarstjórnar bar upp ársreikning fyrir Garð árið 2004 með eftirfarandi niðurstöðutölum:
Sveitarsjóður Samstæða
Tekjur 400.866 426.758
Gjöld 355.451 368.656
Fjármagnsliðir (25.043) (52.763)
Rekstrarniðurstaða (132) (3.109)
Fastafjármunir samtals 1.129.261 1.322.746
Eignir samtals 1.293.469 1.447.990
Eigið fé 625.157 561.984
Langtímaskuldir 512.893 724.689
Skammtímaskuldir 93.939 99.837
