Bæjarstjórn Reykjanesbæjar: Spurt um dvöl bæjarfulltrúa í Kaupmannahöfn

Lögð var fram fyrirspurn á fundi bæjarstjórnar Reykjanesbæjar í gær vegna ferðar bæjarfulltrúa og embættismanna Reykjanesbæjar til Kaupmannahafnar í kjölfar ferðar á vinabæjarmót í Kerava í Finnlandi í byrjun júní. Fulltrúar Reykjanesbæjar sem fóru á vinabæjarmótið dvöldu í tvo sólarhringa í Kaupmannahöfn áður en þeir héldu heim til Íslands. Kjartan Már Kjartansson bæjarfulltrúi Framsóknarflokksins lagði fram fyrirspurnina þar sem hann meðal annars spyr hvaða bæjarfulltrúar og embættismenn og og makar, sem fóru á vinabæjamótið í Kerava, dvöldu á vegum Reykjanesbæjar í Kaupmannahöfn á heimleið frá vinabæjamótinu?
Meðfylgjandi eru spurningar Kjartans og svör Árna Sigfússonar bæjarstjóra.

1. Hvaða bæjarfulltrúar/embættismenn og makar, sem fóru á vinabæjamótið í Kerava, dvöldu á vegum Reykjanesbæjar í Kaupmannahöfn á heimleið frá vinabæjamótinu?
2. Hver var tilgangur heimsóknarinnar til Kaupmannahafnar?
3. Hvaða bæjarfulltrúar/embættismenn, sem ekki fóru til Kerava, áttu kost á að taka þátt í þessari heimsókn?
4. Hvernig var staðið að kynningu þessarar heimsóknar fyrir bæjarfulltrúum/embættismönnum sem ekki fóru til Kerava?
5. Á hvaða vettvangi var tekin ákvörðun um heimsóknina til Kaupmannahafnar?
6. Hver var kostnaður Reykjanesbæjar vegna heimsóknarinnar til Kaupmannahafnar og hvernig skiptist hann?


Eftirfarandi eru svör Árna Sigfússonar, bæjarstjóra við spurningum Kjartans Más Kjartanssonar.

Í undirbúningi og aðdraganda vinabæjafundarins í Kerava, Finnlandi var rætt við þá fulltrúa sem valdir voru af bæjarstjórn til farar á vinabæjafundinn um að nýta ferðina og fá kynningarfundi í Kaupmannahöfn á leiðinni til baka.

Vinabæjaheimsóknin var tekin fyrst fyrir á fundi bæjarráðs 19. febrúar s.l. og bæjarstjóra falinn undirbúningur. Þann 5. maí s.l. sendi bæjarstjóri erindi til tilnefndra bæjarfulltrúa með hugmyndum um að í bakaleiðinni frá Helsinki yrði farið til Kaupmannahafnar í tveggja daga kynnisferð og drög að dagskrá kynnt.
Þann 13. maí sl. var lögð fram dagskrá vinabæjamótsins í bæjarráði. Þar sem KMK var ekki tilnefndur sem fulltrúi í ferðina var honum ekki sent boð um framlengda ferð.

Viðar Már Aðalsteinsson framkvæmdastjóri Umhverfis- og tæknisviðs sá um undirbúning, þar sem flest sem ræða skyldi tengdist Umhverfis- og skipulagsmálum. Hagkvæmt þótti að nýta ferðina þar sem ferðakostnaður sparaðist við það. Engir dagpeningar voru greiddir út til bæjarfulltrúa.

Í framhaldi af vinabæjamótinu var því farið í gegnum Kaupmannahöfn þar sem dvalið var í tvo daga.
Fundir og kynnisferðir voru fyrir bæjarfulltrúa mánudag og þriðjudag og haldið heim á þriðjudagskvöldið.
Verkefnið í Kaupmannahöfn var að afla upplýsinga um nýjar leiðir í fráveitumálum, en ný tækni getur gert kleift að spara hundruð milljóna í þeirri framkvæmd. Í framhaldi af þeim upplýsingum sem þar komu fram verður efnt til sérstaks kynningarfundar síðar.
Farið var til Torstorp skóla í Taastrup og skoðaðar lausnir í innréttingum grunnskóla sem taka mið af sveigjanleika í námstilhögun líkt og stendur til að framkvæma við Akurskóla.
Þá voru skoðaðar lausnir í dvalarheimilum aldraðra og séríbúðir bæði við Musvaagevej, Alholmshjemmet, endurbætur í umhverfi við Abel Cathrinesgade og Hedebygade. Einnig var fundur með forsvarsmönnum nýrrar Hverfisþjónustumiðstöðvar við Holmbladsgade, sem er upplýsingamiðja fyrir margvíslega þjónustu, líkt og er til skoðunar hjá Reykjanesbæ.

Bæjarfulltrúarnir Böðvar Jónsson, Björk Guðjónsdóttir, Árni Sigfússon bæjarstjóri og Viðar Már Aðalsteinsson framkvæmdastjóri Umhverfis- og skipulagssviðs voru með í för. Einnig slóst með í för í Kaupmannahöfn Steinþór Jónsson bæjarfulltrúi og formaður Skipulagsnefndar, en hann kom frá Íslandi á eigin vegum. Bæjarfulltrúi Guðbrandur Einarsson hafði verið valinn af minnihlutanum til þátttöku í vinabæjamótinu og var boðið að slást með í kynnisförina. Hann sá sér ekki fært að gera það. Makar tóku ekki þátt í þessum fundum og ferðum í Kaupmannahöfn og dvöl maka, þar sem það átti við, var að sjálfsögðu ekki á vegum bæjarins.

Kostnaður vegna funda og kynnisferða í Kaupmannahöfn var eingöngu hótelgisting í tvær nætur. Engir dagpeningar voru greiddir til bæjarfulltrúa vegna kynnisferðar í Kaupmannahöfn. Bæjarfulltrúar greiddu sjálfir hótelgistinguna í Kaupmannahöfn en munu fá hana endurgreidda gegn framvísun reiknings.