Bæjarstjórinn í Garði: Við munum sigrast á vandamálum Gerðaskóla
Víkurfréttir vöktu athygli á vf.is á sláandi upplýsingum úr skólastarfinu í Garði sem getið er um í fundargerð skólanefndar Gerðaskóla nú á dögunum. Þar kemur fram í svari meirihluta skólanefndar í svarbréfi til Mennta- og menningarmálaráðuneytis að í Garði þurfi 13,3% nemenda að þola einelti, að af hverjum 100 börnum við skólann þurfi 13 börn að þola einelti oftar en tvisvar til þrisvar í mánuði. Þá getur meirihluti skólanefndar um það í svarbréfi sínu til ráðuneytisins að í skólanum hafi myndast fámenn klíka starfsmanna sem í krafti samstöðu og langs starfsaldurs ráði í raun miklu, of miklu, um stjórn skólans.
Í sama bréfi til ráðuneytisins er einnig greint frá því að fjölskyldur hafi flutt burt úr sveitarfélaginu til að forða börnum sínum frá einelti í skólanum.
Til að varpa ljósi á það sem er að gerast í þessu eldheita máli í Garðinum tókum við Ásmund Friðriksson, bæjarstjóra, tali.
- Hvað er að gerast í skólanum og af hverju viðgengst einelti þar?
„Það er alveg ljóst á könnunum sem gerðar hafa verið í Gerðaskóla á undanförnum árum að þar hefur einelti verið afar hátt hlutfall í skólanum. Skólastarfið og samfélagið hérna er litað af því að slíkt eigi sér stað í skólanum. Það má lesa út úr þeim tölum sem frá skólanum koma að eineltið sé um og yfir 13% hjá nemendum. Landsmeðaltalið er um 4%. Við erum því að tala um hundruð prósenta umfram landsmeðaltal sem er gríðarlega alvarlegt.
- Það má lesa út úr bókunum að þetta sé af einhverri óvild í garð skólans að þið í meirihlutanum svarið bréfi Mennta- og menningarmálaráðuneytisins með eins afgerandi hætti og meirihluti skólanefndar hefur lagt til.
„Í fyrsta lagi þá eru það ekki við í bæjarstjórninni sem drögum upplýsingarnar fram í dagsljósið. Skoðanakannanirnar eru gerðar á vegum skólans og þær eru inni á heimasíðu hans. Þær eru unnar af skólanum. Það voru því ekki bæjarstjórinn eða meirihlutinn sem var að búa þessar upplýsingar til. Það gætir misskilnings með það og ég heyri það úr skólanum að við séum að leggja eyrun við Gróusögum og söguburði. Það er fjarstæða. Það var gerð skýrsla árið 2008 um æskulýðs- og skólastarf í Garðinum sem var ekki nógu góður vitnisburður um skólastarfið. Því miður hefur ekki verið unnið með niðurstöður þessarar skýrslu eins og til stóð og við stöndum þess vegna í sömu sporunum og 2008 í þessum efnum.
Það var hluti af áætlunum okkar strax síðasta haust að taka á skólamálunum og koma þeim í betra horf og laga þar ýmislegt sem þetta samfélag hefur krafist á undanförnum árum og ekki verið gert.
Við ætluðum að sameina Tónlistarskólann í Garði og Gerðaskóla og þar með hefði verið ráðinn nýr skólastjóri að stofnuninni. Það átti að vera hluti af endurskipulagningunni á stjórnun skólans. Það náði ekki fram að ganga og við gengum til baka með það vegna þungrar og mikillar andstöðu við sameiningu skólanna.
- Er þetta pólitík?
Ef það er pólitík að vilja bæta skólastarfið, ef það er pólitík að koma í veg fyrir einelti nemenda þá er þetta pólitík. Þetta er hagsmunapot í skólanum. Það er búið að vera lengi og við þurfum að vinda ofan af því. Ef við viðurkennum ekki vanda skólans í eineltismálum og frammistöðu hans í námi, þá munum við engum árangri ná. Við eigum að leggja allan okkar metnað í gott skólastarf og skóla. Við erum með frábæran leikskóla og það má segja það sama um tónlistarskólann. Við höfum hins vegar ekki náð að fylgja því starfi eftir í Gerðaskóla sem við ætlum okkur að ná. Ekki skortir aðbúnaðinn og ég er sannfærður um það að skólastjórinn er allur af vilja gerður að bæta skólastarfið en hann hefur ekki náð því fram. Skólabraginn þarf að bæta.
- Er þá skólinn í gíslingu?
„Ég er ekki að segja það að hann sé í gíslingu en það er margt í skólabragnum sem má betur fara. Hér eru góðir kennarar og það er lýsandi fyrir góða kennara að þeir eru sterkir persónuleikar og láta mikið að sér kveða. Það þarf að beisla það góða í þeim og skólanum, börnunum til heilla. Kennararnir eru þjónar barnanna, ekki öfugt.
- Tölur sem sýna að 13,3% nemenda finni fyrir vanlíðan vegna eineltis í skólanum segja það að eitthvað mikið sé að. Kunnið þið skýringu á því hvers vegna tölur yfir einelti eru svona miklu hærri hér en landsmeðaltalið?
„Ég tel að það sé stjórnunarlegs eðlis. Það er ekki tekið nógu fast á málunum og þeim er ekki alltaf fylgt eftir þegar þau koma upp. Það segja mér foreldrar sem koma til mín og leita hér skjóls í málum sínum gagnvart skólanum. Foreldrar sem vilja flytja úr bænum með börnin sín og segjast vera að gefast upp á samstarfi sínu við skólann. Við, sem stjórnum bænum og starfsfólk skólans, verðum að taka höndum saman um það að koma þessum málum í lag. Þau lagast ekki með því að vilja ekki sjá ekki vandann. Hér verða allir að leggjast á eitt og taka á þessum alvarlegu vandamálum saman, samfélagið, foreldrar og kennarar. Við í meirihluta bæjarstjórnar erum tilbúin í það.
- Nú er þetta ekki jákvæð umræða fyrir sveitarfélagið. Þið eruð tilbúin að taka þennan slag?
„Við verðum að snúa umræðunni við, því fyrr sem við viðurkennum vandann því fyrr gerist það. Það stendur ekki á mér eða okkur, sem veitum þessari bæjarstjórn forystu að vinna að þessum málum. En þá verðum við líka að finna fyrir samstarfsvilja til þess og við bíðum eftir því. Við höfum óskað eftir sérstakri stjórnsýsluúttekt með áherslu á stjórnun skólans. Það var samþykkt í bæjarstjórn af öllum bæjarfulltrúum. Sú úttekt fer væntanlega fram á næstunni. Nú hefur ráðuneytið fengið öll gögn um skýrsluna frá 2008 sem beðið var um og við eigum von á að heyra frá þeim fljótlega.
- Hvernig ætlið þið þá að taka á vandanum núna?
Við erum ákveðin í því að ná tökum á vandanum innan skólans, það er alveg ljóst og það viljum við gera í samstarfi við starfsmenn skólans – en þeir verða auðvitað að vera tilbúnir í það samstarf líka. Við erum að gera samning við Fræðsluskrifstofu Reykjanesbæjar um aukið og öflugra samstarf, nýja stefnumótun fyrir skólastarfið sem á að verða það leiðarljós sem við öll sameinumst um að sjá í framtíðinni.
Gerðaskóli skal verða sá skóli sem við verðum stolt af í Garðinum innan fárra mánaða og sá segull sem dregur hingað fólk til búsetu í samtaka samfélagi sagði Ásmundur Friðriksson bæjarstjóri að lokum.
