Bæjarstjóri Voga hættir

Eirný Vals lætur í dag af störfum sem bæjarstjóri Voga á Vatnsleysuströnd. Að sögn Eirnýjar var hún leyst frá störfum vegna breytinga á meirihlutanum, en fyrri meirihluti sprakk vegna deilna um lagningu háspennulína um sveitarfélagið. Þetta kemur fram í frétt á mbl.is.

Nýr meirihluti H-lista og L-lista var í kjölfarið myndaður og má nú ætla að meðal fyrstu verka hans verði að ráða nýjan bæjarstjóra. Eirný segir að uppsögn hennar hafi ekki komið á óvart miðað við það sem á undan hafði gengið í bæjarstjórninni. Aðspurð segist hún ekki vita hver eftirmaður hennar verður. Ekki náðist í Ingu Sigrúnu Atladóttur, forseta sveitastjórnar.

Deilurnar í sveitastjórn Voga hafa snúist um hvort leggja skuli nýjar raflínur í jörð um land Voga. Það mál er að sögn Eirnýjar í ferli og verður tekið fyrir í breyttu deiliskipulagi.