Bæjarráð vill ekki selja Sigurði fartölvuna; Verður að skila henni

Sigurður Jónsson, fráfarandi bæjarstjóri í Garði, verður að skila fartölvu þeirri sem hann hafði til umráða hjá sveitarfélaginu. Sigurður hafði óskað formlega eftir því að sveitarfélagið seldi honum fartölvuna en því var hafnað á bæjarráðsfundi í gær.

Bæjarráð biður Sigurð að skila fartölvunni eigi síðar en 1. ágúst með þeim gögnum sem kunna að vera geymd á henni og varða bæjarfélagið. Var bæjarstjóra falið að tilkynna Sigurði þessa niðurstöðu. Bæjaráð samþykkti þetta með atkvæðum frá fulltrúum N-lista en fulltrúi F-lista sat hjá.

Sigurður verður þá væntanlega að nota helgina til að afrita einkagögnin sín af tölvunni góðu áður en hann skilar henni í næstu viku; - tölvunni sem ný bæjaryfirvöld vilja fyrir engan mun missa.

Mynd: Ekki vitum við hvort þetta er tölvan umrædda en myndin var tekin við opnun nýrrar vefsíðu Garðs á meðan Sigurður var þar sveitarstjóri.