Auknar líkur á lokun herstöðvarinnar?

Líkur á lokun herstöðvarinnar í Keflavík jukust verulega í gær þegar þjóðaröryggisráðgjafi Bandaríkjanna tók við forræði í samskiptum við íslensk stjórnvöld af utanríkisráðuneytinu.

Þetta kom fram í fréttum Stöðvar 2. Þar sagði að bandaríska utanríkisráðuneytið hefði hingað til spornað gegn því að varnarmálaráðuneytið fengi því fram framgengt að Keflavíkurstöðinni yrði lokað. Eftir snubbótt samtöl íslenskra og bandarískra embættismanna vestra í síðustu viku hefðu yfirmenn bandaríska utanríkisráðuneytisins beðist undan því að sinna málinu.

Þjóðaröryggisráðgjafi Bandaríkjanna er Steve Hadley og telst hann til "haukanna" í Washington, segir á vef Ríkisútvarpsins.

Valur Ingimundarson, sagnfræðingur og sérfræðingur í samskiptum Íslands og Bandaríkjanna, efast um að grundvallarbreyting hafi orðið í varnarmálum Íslands á síðustu dögum. RÚV greinir frá.

Stöð tvö sagði frá því í gærkvöld að líkur á lokun herstöðvarinnar í Keflavík hefðu aukist verulega í gær vegna þess að þjóðaröryggisráðgjafi Bandaríkjanna hefði tekið við forræði í samskiptum við íslensk stjórnvöld af utanríkisráðuneytinu.

Valur Ingimundarson kvaðst í samtali við fréttastofu Útvarps ekki hafa haft ráðrúm til að kanna þetta nánar en hins vegar væri fátt sem benti til að ný staða væri komin upp, miðað við það sem sagði í fréttinni.

Þjóðaröryggisráðið hefði um langt skeið átt aðild að varnarmálum Íslands, málefni varnarsamningsins hefðu verið hjá varnarmálaráðuneytinu, Þjóðaröryggisráðinu og utanríkisráðuneytinu.

Viðræðum Íslendinga og Bandaríkjanna var óvænt frestað í fyrri viku áður en formlegir fundir hæfust, ekki hefur verið upplýst hvert framhaldið verður.