Aukin umsvif hjá Sýslumanninum í Keflavík

Öll afgreiðsla íslenskra vegabréfa verður á hendi sýslumannsembættisins í Keflavík frá og með 11. apríl næstkomandi.

Færslan á þessu verkefni frá útlendingaeftirlitinu er liður í endurskipulagningu sýslumannsembættanna á landinu. Hún miðar að því að dreifa verkefnum og mun sýsluskrifstofan á Blönduósi til dæmis sjá um alla sektainnheimtu á landsvísu.

Vegna þessara auknu umsvifa mun sýsluskrifstofan fjölga starfsfólki og opna útibú að Brekkustíg 39 í Njarðvík þar sem vegabréfaútgáfan verður til húsa ásamt ökuskírteinaútgáfu embættins og tollafgreiðslu. Stöðugildi verða fjögur um vetrartímann en með auknum umsvifum á sumrin verða þar allt að sjö starfsmenn.
Fyrirkomulagið verður með þeim hætti að ljósmyndaaðstöðu verður komið upp hjá öllum embættum og myndir og fingraför viðkomandi send á rafrænu formi til Keflavíkur þar sem vegabréf verða útbúin og fullunnin.

„Reynsla okkar og staðsetning nálægt alþjóðaflugvellinum gerir okkur að góðum kosti til að sinna þessu verkefni,“ sagði Ásgeir Eiríksson, sýslumannsfulltrúi í Keflavík, í samtali við Víkurfréttir. „Það er greinilegt að ráðuneytið hefur fulla trú á okkur til að standa vel að þessu verkefni og við ætlum að standa undir því trausti.“