Atvinnuráðgjöf SSS: Jákvæð uppbygging

Atvinnuráðgjafi Sambands sveitarfélag á Suðurnesjum, Guðbjörg Jóhannsdóttir, hefur nú starfað í hátt á þriðja ár á Reykjanesi. Áhugavert er að fá innsýn í helstu verkefnum sem komið hafa inn á borð hjá Guðbjörgu. Blaðamaður Víkurfrétta bað Guðbjörgu að upplýsa íbúa á Reykjanesi um hvað felist í starfi atvinnuráðgjafa SSS og þann árangur sem starfið hefur skilað inn á Reykjanes.

Starf atvinnuráðgjafa er mjög fjölbreytt og áhugavert, í flestum tilfellum felur starfið í sér jákvæða uppbyggingu. Með því á ég við að verið er að móta eitthvað nýtt, eða verið að þróa eða endurskoða það sem fyrir er í þeim tilgangi að ná enn betri árangri á ákveðnum sviði.
Starfið felur í sér aðkomu að atvinnuþróun á Reykjanesi sem er víðfemt verkefni og kemur víða við. Ef ég skima yfir verkefni mín þá má m.a. skipta verkefnunum niður í ráðgjöf og handleiðslu, sérverkefni af ýmsu tagi, leit að fjármagni og leiðum til að koma Reykjanesi á framfæri t.d. ferðaþjónustunni. Þá er starf mitt tengt Byggðastofnun, þeirri tengingu fylgja ákveðnar skyldur.

Ráðgjöf og handleiðsla
Ráðgjöf og handleiðsla eru að mínu mati mikilvægir þættir í atvinnuuppbyggingu almennt. Aðgangur almennings að upplýsingum og tækifæri til að bera hugmyndir sínar undir ráðgjafa er ómetanlegt. Með því að viðra hugmyndir sínar við annan aðila er hugmyndin t.d. skoðuð út frá öðru sjónarhorni. Slík skoðun er nauðsynleg þegar verið er að móta og meta nýjar hugmyndir. Þá fá aðilar er hingað koma leiðsögn um hvernig megi forgangsraða framkvæmdum, aðstoð við að leita fjármagns og hugmyndir um hvernig og hvar megi leita fjármagns. Oft á tíðum eru aðilar sem til mín koma sérfræðingar á ákveðnu sviði, því er nauðsynlegt að huga að heildar myndinni viðskiptalegum þáttum og þá má ekki gleyma markaðssetningunni. Það er mjög gott að hafa góða hugmynd en það er aðeins einn hluti af því ferli sem felst í að nýta ákv. viðskiptatækifæri. Fyrir þá sem búa yfir viðskiptahugmynd er boðið upp á námskeið þar sem farið er í gerð viðskiptaáætlana. Aðrir aðilar sem af einhverri ástæðu geta ekki sótt námskeið fá persónulega aðstoð og handleiðslu. Með þeirri aðstoð og leiðsögn sem boðið er upp á í tengslum við atvinnuráðgjafa SSS er fyrst og fremst verið að styðja og efla fólkið á svæðinu til að hafa áhrif á þróun atvinnulífs á svæðinu. Fjölmargir hafa sótt námskeiðin og enn fleiri hafa óskað eftir persónulegri aðstoð og handleiðslu frá því Guðbjörg kom til starfa.

Sérverkefni
Þá koma ýmis sérverkefni inn á borð til mín, öll eiga verkefnin það sameiginlegt að stuðla að eflingu og uppbyggingu atvinnulífs á svæðinu. Að jafnaði er hlutverk mitt að sjá um verkefnastjórn, oft vinn ég með skilgreindum undirbúningishópi í sérhverju verkefni og fylgi eftir þeirri ákvarðanatöku sem á sér stað. Það má einnig segja að ég sjái til þess að verkefni hafi upphaf og endir!. Fjármögnun viðkomandi verkefna getur verið af ýmsum toga oft eru verkefnin fjármögnuð af aðilum á svæðinu eða /og styrkt með einhverjum hætti úr opinberum sjóðum.

Til að gefa hugmynd um hvernig verkefni ég er að tala um má nefna verkefnið „Starfsframi og fjölskyldan” sem hófst þann 10.febrúar s.l. með ráðstefnunni „Konur – aukin áhrif á vinnumarkaði”. Markmið með því verkefni er að myndun tengslaneta sem eru svo mikilvæg í nútíma samfélagi. Þá verður í framhaldi rýnt í stöðu kynjana á vinnumarkaði og í samfélaginu. Verkefninu lýkur svo með áherslu á hámarksárangug og jafnvægi á milli kynjana í leik og starfi. Íslandsbanki, Hitaveita Suðurnesja, Byggðastofnun og Samband sveitarfélaga á Suðurnesjum hafa komið að fjármögnun þessa verkefnis.
Þá var einnig farið í markaðsátak í ferðaþjónustu sem var samvinnuverkefni við Ferðamálaráð. Markaðsátakið var samstarfsverkefni við Ferðamálaráð Íslands, aðila í ferðaþjónustu á Reykjanesi og SSS.
Þá er einnig verið að vinna að uppbyggingu alþjóðanáms í veiðarfæragerð, verkefnið er unni í samvinnu við sérfræðinga í veiðarfæragerð á svæðinu, Fjölbrautaskóla Suðurnesja, Grindavíkurbæ og Atvinnuráðgjafa SSS.

Önnur verkefni geta snúist um að skoða aðstæður og undirlag til að fara í ákveðna framkvæmd eða til að mynda ákveðið samstarf. Sum þessara verkefna verða að veruleika en önnur verða að engu en skilja eftir sig oft á tíðum ómetanlega þekkingu sem hægt er að ganga að síðar.

Framkvæmdafé
Í mínu starfi aðstoða ég frumkvöðla og athafnafólk til að leita að framkvæmdafé. Ýmist er slíkt rekstrarfé í formi styrkja eða lánsfé sem leiðir af sér að fyrirtæki á Reykjanesi fá aukið framkvæmdafé. Hátt í tvö hundruð milljónir hafa komið inn á Reykjanes í formi framkvæmdafjár frá því á vordögum 2003. Styrkir hafa ýmist verið veittir í verkefni á sviði nýsköpunar eða til ferðaþjónustunnar á svæðinu. Það er ánægjulegt að hafa átt þátt í því að koma með slík verðmæti inn á svæðið sem ætluð eru til atvinnuþróunar.

Byggðakvóti
Þá má einnig nefna að ég tek þátt í að sækja um til hinna ýmsu verkefna sem eru á vegum hins opinbera. Það er gaman að segja frá því að góður árangur skilaði sér þegar sveitarfélagið Garður fékk úthlutuðum 150 tonnum af byggðakvóta nú á haustdögum. Þá má einnig geta þess að Sandgerði fékk úthlutaðan 140 tonn af byggðakvóta fyrir sama tímabil.

Á þeim tíma sem ég hef starfað sem atvinnuráðgjafi hjá Sambandi sveitarfélaga á Suðurnesjum hafa verðmæti borist inn á svæðið fyrir mína atbeina. Það skiptir mig máli að skila árangri í starfi og er mér sönn ánægja að stór hluti af þeim árangri sem ég hef skilað inn á svæðið er áþreyfanlegur. Það er bæði áhugavert og gaman að vinna með frumkvöðlum hér á svæðinu. Upp til hópa eru þeir atorkusamir og búa margir hverjir yfir mikilli þrautsegju, en úthald og þrautsegja eru nauðsynlegir mannkostir við mótun og uppbyggingu í atvinnulífinu.

Þá vill Guðbjörg hvetja alla þá sem þarfnast handleiðslu að hafa samband við sig á skrifstofum Sambands Sveitarfélaga á Suðurnesjum.