Ástarbrú á milli heimsálfa
Tugir lása hengdir á brúna á undanförnum árum.
Ný hefð virðist hafa fest sig í sessi á brúnni milli heimsálfa upp af Sandvík á Reykjanesi. Tugir lása hafa verið festir á brúna, auk vinabands. Eins og sjá má á meðfylgjandi myndum eru margir lásanna áletraðir og sumir hverjir afar litríkir. Þá hefur hjarta verið mótað með steinum í sandinn neðan við brúna og því virðist sem ástin sé hugleikin fólki sem þangað kemur.
Skemmst er að minnast hefðar sem Daniel Alexandersson, nemi í Akurskóla, kom af stað fyrr á árinu um að „halda á brúnni“. Fjölmargir hafa leikið það eftir og birt myndir á samfélagsmiðlum.
Núna geta ferðamenn og heimamenn byrjað á því að hengja lás á brúna og haldið síðan á henni.
VF-myndir/Hilmar Bragi
