Árangursríkar húsleitir hjá hælisleitendum í Reykjanesbæ

Um kl. 07:30 í morgun fóru lögreglumenn frá Lögreglustjóranum á Suðurnesjum, Lögreglustjóranum á höfuðborgarsvæðinu og frá Ríkislögreglustjóra í húsleitir á 7 dvalarstaði hælisleitenda í Reykjanesbæ. Voru húsleitirnar sameiginlegt verkefni lögregluembættanna þriggja auk Útlendingastofnunar og hafði verið vandlega undirbúnar og framkvæmdar á grundvelli fyrirliggjandi dómsúrskurða frá Héraðsdómi Reykjaness.

Meginmarkmið húsleitanna var að leita persónuskilríkja og annarra gagna til að bera kennsl á hælisleitendur en lögregla hefur rökstuddan grun um að hælisleitendur komi slíkum gögnum undan og framvísi þeim ekki við yfirvöld meðan á hælismeðferð stendur.

Í húsleitunum haldlagði lögreglan vegabréf, önnur persónuskilríki, ýmis skjöl og reiðufé í ýmsum gjaldmiðli að andvirði rúmlega 1,6 milljóna króna.

Húsleitirnar voru mjög árangursríkar og gekk framkvæmd þeirra vel í alla staði. Þau gögn sem lögregla haldlagði munu gera Útlendingastofnun kleift að hraða úrlausn fjölda þeirra mála sem stofnunin hefur til meðferðar og taka ákvarðanir á réttum forsendum. Verulegur fjárhagslegur ávinningur er af því að hraða meðferð hælismála hjá Útlendingastofnun.