Ánægjulegt að horfa á eftir fólki út í atvinnulífið

Mun minni þörf er fyrir fjárhagsaðstoð frá Reykjanesbæ en verið hefur vegna aukinna atvinnutækifæra og vaxandi atvinnuþátttöku íbúa. Einstaklingum á fjárhagsaðstoð hefur fækkað verulega, að sögn Heru Óskar Einarsdóttur, framkvæmdastjóra velferðarsviðs Reykjanesbæjar.

Stærsti hópur þess fólks sem nýtur fjárhagsaðstoðar frá Reykjanesbæ er vinnufært fólk sem er dottið út úr atvinnuleysisbótakerfinu. Því hefur staðið til boða alls kyns vinnumarkaðsúrræði og námskeið í samstarfi við Miðstöð símenntunar á Suðurnesjum, Vinnumálastofnun og Fjölsmiðjuna. „Í þessum úrræðum er m.a. sjálfsstyrking, styrking til starfa, atvinnuráðgjöf, gerð ferilsskrár og ýmis námskeið sem viðkomandi þarf að fara í gegnum til þess að ná árangri í atvinnuleit. Að undanförnu hefur vinnumarkaðurinn tekið við sér og störfum fjölgað, m.a. í starfsemi tengdum Keflavíkurflugvelli og í ferðaþjónustu, s.s. bílaleigum. Það hefur verið mjög ánægjulegt að horfa á eftir því fólki, sem hefur nýtt sér þessi úrræði, út í atvinnulífið,“ sagði Hera.

Auk þess hefur einstaklingum, sem eru óvinnufærir á fjárhagsaðstoð, staðið til boða starfsendurhæfing á vegum Virk. „Í starfsendurhæfingu fær fólk einstaklingsbundna þjónustu til að efla styrkleika sína og ná aftur færni til atvinnuþátttöku. Stuðningur fyrirtækja og stofnana í starfsendurhæfingu er ómetanlegur og mikilvægt að hafa aðgang að fjölbreytilegum úrræðum til stuðnings þessum einstaklingur, sagði Hera.

Aðstoðarþegum hefur fækkað um 25% milli apríl 2014 og apríl 2015. Á fyrstu árum eftir hrun voru á milli 4 og 5% íbúa 18 ára og eldri á fjárhagsaðstoð en sú tala var 2,7% í apríl sl.