Ánægður með nýja skólabílinn

Grindavíkurbær fékk afhenta nýja bifreið sl þriðjudag, Toyota Hiace, sem notuð verður til aksturs fatlaðra barna og skólabarna sem búsett eru í Þórkötlustaðahverfi.
Óskar Ágústsson bílstjóri leist ágætlega á nýja bílinn en hann var ekki búinn að prufukeyra hann þegar blaðamaður VF mætti á staðinn til að skoða gripinn.
,,Við höfum verið með Ford Econoline sem var orðinn gamall og þreyttur. Ég fer kvölds og morgna með fatlaða einstaklinga héðna og flyt þá á Hæfingarstöðina í Keflavík. Ég kem líka við í Vogunum og tek tvo einstaklinga þar. Þess á milli ek ég grunnskólabörnum sem búa í Þórkötlustaðahverfi, til og frá skóla en í bílnum er pláss fyrir níu manns’’, sagði Óskar og veifaði nýju bíllyklunum.