Álver Alcan: Keilisnes enn inni í myndinni

Engin ákvörðun hefur verið tekin um staðsetningu álvers sem Alcan hyggst reisa hér á landi, en tveir kostir þykja koma helst til greina, Þorlákshöfn og Keilisnes.

Eins og flestum ætti að vera kunnugt fengu bæjaryfirvöld í Vogum umboð til að ganga til viðræðna við Alcan um möguleikana á Keilisnesi.

Á vef Morgunblaðsins er haft eftir Michel Jaques, forstjóra Alcan Primary Metal Group, að verkfræðingar Alcan erlendis muni taka málilð til athugunar.

Á vísi.is er hins vegar haft eftir Jaques að þeir horfi nú sérstaklega til Þorlákshafnar í þessu tilliti.

Til stendur að reka álverið í Straumsvík áfram.

Róbert Ragnarsson, bæjarstjóri í Vogum sagði í samtali við Víkurfréttir að fulltrúar Voga myndu funda með Alcan-fólki í næstu viku.

„Við erum aðveg rólegir yfir þessu og ég held að Alcan sé það líka. Þeir einu sem eru að æsa sig yfir þessu eruð þið fjölmiðlamenn,“ sagði Róbert sposkur að lokum.