Almannavarnir vara við veðri á gamlársdagsmorgun

Á gamlársdagsmorgun er útlit fyrir allhvassa suðaustanátt sunnan- og vestantil á landinu með snjókomu og skafrenningi samkvæmt Veðurstofu Íslands. Það eru því líkur á að færð spillist. Þetta kemur fram í tilkynningu frá Almannavarnadeild ríkislögreglustjóra.

Á morgun (30. desember) verður hins vegar rólegt veður víðast hvar og er fólk hvatt til að nýta daginn til að klára að útrétta fyrir áramótin.

Á heimasíðu Vegagerðarinnar kemur einnig fram að búast megi við að færð á vegum verði þung og að jafnvel komi til lokana. Því eru vegfarendur hvattir til að fylgjast vel með færð og veðri á umferdin.is ef ætlunin er að aka milli landshluta.