Allir bæjarfulltrúar í Sandgerði segja sameiningu ekki tímabæra

Það er trú bæjarfulltrúa Sandgerðisbæjar að hag bæjarbúa sé best borgið með því að reka sjálfstætt bæjarfélag þar sem íbúar á staðnum geta mótað umhverfið sitt og lífsafkomu í samræmi við þarfir og óskir íbúa sem búa á staðnum.
Lág þjónustugjöld hjá Sandgerðisbæ og miklar tekjur pr. íbúa segir í raun allt sem segja þarf í þessum efnum. Þetta kemur fram í bókun sem bæjarfulltrúar Sandgerðisbæjar lögðu fram á bæjarstjórnarfundi í gær. Þá segir einnig að mikilvægt sé að öllum sé gefinn sem bestur kostur á því að kynna sér kosti og galla sameiningar þannig að hver og einn geti tekið sjálfstæða og upplýsta ákvörðun.

Bókunin er svohljóðandi:

Bæjarfulltrúar bæjarstjórnar Sandgerðisbæjar teja rétt að íbúar bæjarfélagsins staldri við og hugleiði eigin hagsmuni og ekki síður hagsmuni bæjarfélagsins er varðar sameiningarkosningar sem fram eiga að fara 8. október nk.

Mikilvægt er að öllum sé gefinn sem bestur kostur á því að kynna sér kosti og galla sameiningar þannig að hver og einn geti tekið sjálfstæða og upplýsta ákvörðun.

Bæjarfulltrúar hvetja því íbúa Sandgerðisbæjar til að skoða skýrslu bæjarstjórnar um kosti og galla sameiningar sem er á heimasíðu bæjarfélagsins sem og skýrslu samstarfsnefndar Reykjanesbæjar, Sv. Garðs og Sandgerðisbæjar.

Á síðustu 18 mánuðum er búið að úthluta lóðum fyrir um 200 íbúðir og er mikil uppbygging í gangi í bæjarfélaginu. Það er trú bæjarfulltrúa Sandgerðisbæjar að hag bæjarbúa sé best borgið með því að reka sjálfstætt bæjarfélag þar sem íbúar á staðnum geta mótað umhverfið sitt og lífsafkomu í samræmi við þarfir og óskir íbúa sem búa á staðnum.
Lág þjónustugjöld hjá Sandgerðisbæ og miklar tekjur pr. íbúa segir í raun allt sem segja þarf í þessum efnum.

Bæjarbúar sjá og, að verkefnastaða Sandgerðisbæjar er góð, málefnastaða sterk og umhverfið hefur tekið miklum breytingum á stuttum tíma.
Fá sveitarfélög hafa eins mikið eigið fé pr. íbúa og Sandgerðisbær.

Bæjarfulltrúar eins og aðrir íbúar þurfa að taka afstöðu til sameiningar og eðlilegt að bæjarbúar séu upplýstir um afstöðu þeirra.

Bæjarfulltrúar Sandgerðisbæjar eru þeirrar skoðunar eftir yfirferð og skoðun á kostum og göllum sameiningu sveitarfélaga á Suðurnesjum að sameining umræddra sveitarfélaga sé ekki tímabær.

Ofanrituð bókun var samþykkt samhljóða.