Aldrei verið rætt um einkavæðingu

Einn liður í starfsemi heilsufélags sem ráðgert er að stofna á Suðurnesjum fælist í því að markaðssetja læknisþjónustu erlendis. Sjúklingar kæmu þá hingað til lands til að leita sér lækninga. Er horft til þess að nýta þá aðstöðu sem er fyrir hendi, t.d. á skurðstofum Heilbrigðisstofnunar Suðurnesja. „Þetta snýst ekki um og það hefur aldrei verið rætt að einkavæða Heilbrigðisstofnun Suðurnesja,“ sagði Árni Sigfússon, bæjarstjóri í Reykjanesbæ, á fundi bæjarstjórnar á þriðjudaginn þar sem hann fór yfir þær hugmyndir sem uppi eru um stofnun Heilsufélags Reykjaness.

Árni sagðist efins um að þessari viðleitni um betri nýtingu á skurðstofunum yrði illa tekið af nýjum stjórnvöldum. Með þessu væri verið að auka sértekjur sjúkrahússins og þessi starfsemi yrði aldrei í því mæli að hún myndi trufla aðra þjónustu sem fyrir væri. Þvert á móti þá væri talið að með því að nýta skurðstofurnar með þessum hætti yrði til sólarhringsnýting sem skapaði möguleika til að byggja upp fæðingaþjónustu á svæðinu, sem líti ekki vel út í dag.
Árni sagði markmið félagsins m.a. að stuðla að öruggari heilbrigðisþjónustu fyrir íbúa á svæðinu auk þess að skapa ný störf. Rætt er um að á þremur árum verði sköpuð 300 ný störf á heilbrigðissviði.
---