Áhrif sendistyrks á heilsu bæjarbúa verði könnuð

Skipulags- og bygginganefnd Grindavíkur vill láta athuga og skrá senditíðni og sendistyrk þeirra loftneta og fjarskiptamastra sem finna má í nágrenni Grindavíkur. Með þessu verði metin hugsanleg áhætta af staðsetningu þeirra á umhverfi og heilsu bæjarbúa.

Sigurður Kristmundsson, formaður nefndarinnar, lagði fram tillögu þessa efnis á síðasta fundi hennar. Nefndin tók jákvætt í erindið og fól forststöðumanni tæknideildar og formanni nefndarinnar að óska eftir upplýsingum frá viðeigandi fyrirtækjum og stofnunum sem bera ábyrgð á fjarskiptamálum í Grindavík og nágrenni. Nefndin óskar ennfremur eftir umsögn umhverfisnefndar á málinu.