Áhrif hryðjuverkjasprenginga sýnd á Reykjanesi

Sprengjusérfræðingar Landhelgisgæslunnar héldu fyrirlestur um sprengiefni og hryðjuverkasprengjur og sýndu dæmi um mátt sprengiefnis á námskeiði sem nýlega var haldið fyrir Lögregluna í Reykjavík. Flugmálastjórn Keflavíkurflugvallar stóð fyrir námskeiðinu sem stóð í vikutíma en Landhelgisgæslan hefur séð um þennan þátt námskeiðsins sl. þrjú ár og hefur það m.a. farið fram á Suðurnesjum.
Að sögn Adrians King sprengjusérfræðings hjá Landhelgisgæslunni voru nokkrar sprengjur sprengdar til að sýna eyðingarmátt mismunandi sprengiefnis sem notað er í heimatilbúnar sprengjur, þ.m.t.
hryðjuverkasprengjur.  Einnig var ný sérhönnuð bifreið sprengjudeildar Landhelgisgæslunnar sýnd og vélmenni sem danski landherinn gaf Landhelgisgæslunni í fyrra. 
Vélmennið verður til sýnis í Smáralind föstudaginn 11. febrúar næstkomandi á 112-deginum þar sem búnaður viðbragðsaðila í landinu verður sýndur.  Þar verða einnig þyrla Landhelgisgæslunnar og sérútbúna bifreið sprengjudeildarinnar. Sýningin verður á bílaplaninu við Smárabíó klukkan 15-18. 

Á meðfylgjandi mynd sjást leiðbeinendur og þátttakendur á námskeiðinu sem haldið var fyrir lögregluna í Reykjavík fyrir framan sérútbúnu bifreið sprengjudeildarinnar og vélmennið í forgrunni. Myndasmiður var Jónas Þorvaldsson sprengjusérfræðingur hjá Landhelgisgæslunni.