Áframhaldandi landris á svæðinu vestan við Þorbjörn

Með auknu eftirliti berast nú fleiri gögn til Veðurstofu Íslands sem gefa skýrari mynd af þróun mála við fjallið Þorbjörn á Reykjanesskaga.

„Ný gögn sýna áframhaldandi landris á svæðinu vestan við Þorbjörn. Erfitt er að túlka breytingar út frá einstaka mælipunktum, en með því að skoða meðaltal þéttari mælinga, sem nú berast í hús, er greinilegt að landrisið er enn í gangi,“ segir í færslu á fésbókarsíðu Veðurstofunnar síðdegis.

Þar sem um er að ræða langtíma atburð þarf að fylgjast vel með svæðinu og mælingunum þar til lengri tíma, til að átta sig betur á heildarferli jarðhræringanna.

Sérfræðingar Veðurstofunnar í samvinnu við starfsmenn HS Orku hafa í dag unnið að gasmælingum á svæðinu umhverfis Þorbjörn. Þær mælingar gefa engar vísbendingar um að kvika sé komin nálægt yfirborði. Það styðja einnig vatnssýni sem HS Orka tók, en slíkt er gert tvisvar í viku.

Myndin er af GPS mælastöð Jarðvísindastofnunar HÍ, sem nú skilar gögnum í rauntíma til Veðurstofunnar.

Nánar má fylgjast með skjálftavirkni og þróun mála hér.