Áfram kvikusöfnun og Þorbjörn upp um hálfan sentimetra á sólarhring

Kvikusöfnun heldur áfram á svæðinu norðvestan við Þorbjörn á um fimm kílómetra dýpi. Ekkert lát er á landrisi á svæðinu og síðasta sólarhringinn sýna nokkrar mælistöðvar landris upp á um hálfan sentimetra. Ný gervihnattagögn staðfesta áframhaldandi landris.

GPS mælir á Þorbirni reis um hálfan sentimetra síðasta sólarhringinn og hefur risið um 7,5 sentimetra á þeim hálfa mánuði sem hrinan hefur staðið yfir. Sama á við um mælistöðina í Svartsengi. Þá eru þessir mælar einnig að sýna hliðrun, þannig að þeir eru ekki bara á leiðinni beint upp.

Einar Sveinbjörnsson veðurfræðingur vekur athygli á mælistöðinni í Skipastígshrauni í færslu á fésbókinni í morgun. Hann bendir þar á að landrisið á þeirri stöð mælist um níu sentimetrar frá 20. október. Mælistöðin í Skipastígshrauni (SKSH) er fyrir vestan Norðurljósaveginn svokallaða við slóðann í áttina að Eldvörpum.