Aflakóngar í Sandgerði á veglegan skjöld

Sandgerðisbæ barst í síðustu viku glæsileg gjöf frá afkomendum Þórhalls Gíslasonar, fyrrum skipstjóra frá Sandgerði. Þórhallur varð 95 ára þann 14. maí 2011 og í tilefni af afmæli hans fékk sonur hans, Jónas Karl Þórhallsson, þá hugmynd að láta útbúa skjöld með nöfnum aflakónga á vetrarvertíð (1. janúar – 11. maí) í Sandgerði á árunum 1939-1991 og gefa föður sínum í afmælisgjöf frá systkinunum. Sjálfur var Þórhallur aflahæsti skipstjórinn nokkrum sinnum á þessu 52 ára tímabili og aflakóngarnir í þessum hópi oft á tíðum einnig aflahæstir á landinu. Gísli Reynisson sem heldur úti vefsíðunni www.aflafrettir.com tók upplýsingarnar saman en granítskjöldurinn var unninn hjá fyrirtækinu S.Helgason í Kópavogi.

Föstudaginn 24. maí var skjöldurinn afhentur Sandgerðisbæ við hátíðlega athöfn í Þekkingarsetri Suðurnesja, þar sem hann verður varðveittur og til sýnis almenningi.

Margir aflakóngar Sandgerðisbæjar frá fyrri tíð voru viðstaddir athöfnina. Þórhallur Gíslason afhjúpaði skjöldinn ásamt Sigrúnu Árnadóttur, bæjarstjóra Sandgerðisbæjar. Jónas Karl sagði við tilefnið að skjöldurinn væri hugsaður til þess að heiðra minningu þeirra skipstjóra sem á honum eru en hafa fallið frá, en einnig til þess að varðveita söguna um sjósókn frá Sandgerði.

Fleiri myndir frá uppákomunni má sjá á heimasíðu Þekkingarsetursins www.thekkingarsetur.is