Ætlum að nýta frystihúsið í Sandgerði

-- Frystihúsið verður nýtt í framtíðinni þótt það sé ekki ljóst á þessu stigi hvernig starfsemin verður. Við erum að vinna í því að fá vinnsluleyfi og það ætti að vera klárt í næstu viku, segir Bergþór Baldvinsson, framkvæmdastjóri Nesfisks hf. í Garði í samtali við InterSeafood.com, en húsið sem hann vísar til er frystihúsið í Sandgerði sem fyrirtækið keypti fyrr á árinu.
Frystihúsið í Sandgerði, sem lengst af starfaði undir merkjum Miðness hf., komst í eigu Haraldar Böðvarssonar hf. við sameiningu fyrirtækjanna. Húsið er mjög vel útbúið og eftir að Nesfiskur hf. keypti það ásamt verbúð var það notað til þess að frysta loðnu á vertíðinni. Alls voru fryst rúmlega 300 tonn af loðnu á vegum Nesfisks hf. í frystihúsinu í Sandgerði og segir Bergþór að framleiðslan hafi gengið vel.
-- Við keyptum þessar eignir fyrst og fremst til þess að nýta frystigeymslurnar sem rúma 1700 tonn af afurðum því við erum ekki með neinar frystigeymslur hér í Garðinum. Þá höfum við getað nýtt verbúðina fyrir okkar starfsfólk og eins höfum við leigt út íbúðir til annarra, segir Bergþór Baldvinsson.