Ægismenn kaupa nýja björgunarbifreið

Björgunarsveit Slysavarnafélagsins Landsbjargar í Garði, Ægir, hefur fengið nýtt björgunartæki í sína þjónustu. Það er ný björgunarbifreið af gerðinni Land Rover Defender. Bifreiðin er ríkulega útbúin af tækjum og er breytt fyrir 44“ dekk en er á 38“ dekkjum. Þá eru í bílnum staðsetningartæki og allur helsti fjarskiptabúnaður. Tengingar fyrir dráttarspil eru á bílnum. Bifreiðin kostar tæpar fjórar milljónir króna til sveitarinnar.Björgunarsveitin Ægir hefur komið sér mjög myndarlega fyrir í húsnæði sveitarinnar, Þorsteinsbúð við Gauksstaðaveg í Garði. Þar hefur sveitin helstu fjáröflun sína en þar er hægt að fá leigð geymslupláss fyrir tjaldvagna og fellihýsi yfir vetrarmánuðina, aðstaða sem margir nýta sér.