Á fimmta þúsund Suðurnesjamenn fullbólusettir - um 5 þúsund komnir með eina sprautu

„Við höfum nú fullbólusett rúmlega 3000 manns og til viðbótar eru tæplega 4500 einstaklingar búnir að fá sína fyrstu bólusetningu. Við munum bólusetja rúmlega 700 manns með seinni bólusetningu í dag, fimmtudag. Á föstudag munum við svo bólusetja með 480 skömmtum af Janssen og bætast þeir þá við fullbólusetta. Í næstu viku verður hópurinn sem bólusettur var með Astra Zeneca í febrúar bólusettur með seinni skammti,“ segir Andrea Klara Hauksdóttir, hjúkrunardeildarstjóri heilsugæslu HSS.

Bólusetningar hafa að sögn Andreau gengið mjög vel hérna suðurfrá og nú ættu flest allir sem eru í áhættuhópum að vera búnir að fá boð í bólusetningu.

„Við byrjum einnig að bólusetja leikskólakennara og kennara í þessari viku og munum halda áfram með þann hóp í næstu viku.

Að undanförnu höfum við fengið mikið af símtölum og tölvupóstum með fyrirspurnum um bóluefni og forgangshópa. Ég vil benda fólki að það þarf ekki að hafa samband á heilsugæsluna, það getur fengið allar upplýsingar um bóluefni, forgangshópa og svör við öðrum spurningum varðandi bólusetningar bæði á vefsíðu landlæknis landlaeknir.is og covid.is.

Á föstudaginn 7. maí verðum við með opið hús í bólusetningar á Ásbrú milli kl. 12:00 og 13:00 fyrir einstaklinga fædda 1961 og fyrr, 60 ára og eldri sem ekki hafa fengið bólusetningu. Við verðum með bóluefni Astra Zeneca og dugar að mæta á staðinn með skilríki, það þarf ekki að panta tíma. Þeir sem ekki komust þegar þeir fengu boð í bólusetningu geta mætt þá.

Þess má geta að samhliða bólusetningum á Ásbrú er heilsugæslan einnig að sjá um covid sýnatökur á Fitjabrautinni og var apríl mánuður næst stærsti mánuðurinn í sýnatökum hér á Suðurnesjum frá því Covid byrjaði, þannig að það er í mörg horn að líta,“ segir Andrea Klara.

Suðurnesjamagasín fylgdust með bólusetningum í húsnæði Landhelgisgæslunnar á Ásbrú í síðustu viku og ræddi við Sveinbjörgu S. Ólafsdóttur frá HSS og heyrði í nokkrum bæjarbúum sem voru að fá bólusetningu.