Á bráðamóttöku eftir að fjórhjól valt

Talsvert hefur verið um umferðaróhöpp í umdæmi lögreglunnar á Suðurnesjum á undanförnum dögum. Par sem var í fjórhjólaferð á Hópsnesi síðastliðinn laugardag varð fyrir því að hjól þeirra valt. Ökumaðurinn slapp ómeiddur en farþeginn var fluttur með sjúkrabifreið á Landspítala í Fossvogi.

Slysið varð með þeim hætti að parið var aftast í röðinni og hafði dregist aftur úr ferðafélögunum. Ökumaðurinn greip þá til þess ráðs að stytta sér leið en ók á grjót með þeim afleiðingum að hjólið valt.

Enn fremur varð bílvelta á Reykjanesbraut sama dag þegar ökumaður skipti um akrein og bifreiðin lenti í krapa og hálku. Tvennt var í bifreiðinni og sluppu þau ómeidd. Fleiri óhöpp urðu en án meiðsla.

Þá voru fáeinir færðir á lögreglustöð vegna gruns um fíkniefnaakstur og tveir kærðir fyrir hraðakstur í umdæminu.