Á bifhjólum á skólalóðinni

Akstur ungmenna á léttum bifhjólum er mörgum áhyggjuefni í Grindavík. Dæmi eru um að þau komi á slíkum farkostum í skólann og aki þeim á skólalóðinni með tilheyrandi slysahættu. Forvarnarteymi Grindavíkurbæjar mun á næstunni senda frá sér bréf til foreldra og forráðamanna unglinga í Grindavík vegna þessa máls.

Í bréfinu segir að frá því í vor hafi orðið umtalsverð fjölgun á bifhjólaeign grindvískra ungmenna, sérstaklega á svokölluðum léttum bifhjólum. Nú í upphafi skólaárs sé áberandi að ungmenni komi á þessum hjólum í skólann og jafnvel aki á þeim á skólalóðinni. Forvarnarteymið telur þetta algjörlega óásættanlegt því þessu fylgi mikil slysahætta.
Þá sé áberandi að nokkur ungmenni aki þessum hjólum hjálmlaus og jafnvel með farþega, einnig hjálmlausa. Í sumum tilvikum hafi ungmennin ekki tilskilin leyfi til að aka þessum bifhjólum og dæmi séu um óskráð hjól.