89% ánægð með viðmót lækna á HSS

Alls fannst 89% viðmót lækna mjög gott eða frekar gott í viðhorfskönnun sem gerð var á Heilbrigðisstofnun Suðurnesja dagana 22. til 28. apríl sl. Voru allir sem komu í móttöku HSS beðnir um að fylla út spurningalistann. Starfsmaður var á staðnum, sem aðstoðaði þátttakendur og hélt utan um könnunina. 472 einstaklingar svöruðu könnuninni.

Helstu niðurstöður þessarar könnunar voru eftirfarandi:
Í það heila voru þátttakendur í könnuninni mjög jákvæðir í garð starfsfólks HSS og þjónustunnar. 89% fannst viðmót lækna mjög gott eða frekar gott. Rúmum 93% fannst viðmót hjúkrunarfræðinga/ljósmæðra mjög gott eða frekar gott. Tæpum 83% fannst viðmót móttökuritara mjög gott eða frekar gott. Tæp 73% fengu afgreiðslu á síðdegisvaktinni innan klukkustundar frá komu. Þrátt fyrir að margir nefndu langan biðtíma fannst rúmum helmingi biðtíminn á kvöldvaktinni hæfilegur og tæp 70% voru sátt við biðtímann frá pöntun og þar til tími fékkst á dagvinnutímabili (mjög stuttur, stuttur, hvorki stuttur né langur). Rúm 96% töldu sig fá úrlausn að hluta eða að fullu.

Á vef Heilbrigðisstofnunar Suðurnesja segir að stofnunin hafi brugðist við könnuninni á eftirfarandi hátt:
Þó að þessar niðurstöður séu mjög jákvæðar eru stjórnendur og starfsmenn HSS staðráðnir í að gera betur og skoðaðir verða möguleikar á að stytta biðtíma og fjölga læknum eftir því sem fjármagn leyfir, þrátt fyrir að læknaskortur sé í landinu. Byrjað er að endurnýja salernisaðstöðu fyrir viðskiptavini gegnt móttöku. Búið er að setja upp hurð við næturinngang sjúklinga, þannig að enginn þurfi að híma úti meðan beðið er afgreiðslu.