80 milljarða stuðningur ríkissjóðs vegna Grindavíkur

Fjárveitingar í fjáraukalögum fyrir árið 2023, fjárlögum fyrir 2024 og þrennum fjáraukalögum á yfirstandandi ári nema um 22,5 milljörðum króna, þar af 8,2 ma.kr. millifærsla úr almennum varasjóði. Vegur þar þyngst stuðningur vegna launagreiðslna upp á 9,2 milljarða króna. Fjárveitingar vegna byggingar varnargarðs til varnar Grindavíkurbæ og orkuverinu í Svartsengi, nema um 7,2 milljörðum króna. Þá er húsnæðisstuðningur við Grindvíkinga tæpir 3 milljarðar kr.

Áætlað er að veita þurfi frekari fjármagn vegna stöðunnar á Reykjanesskaga, ekki síst til Almannavarna og Vegagerðarinnar og því er nú gert ráð fyrir að stuðningur ríkisins vegna jarðhræringanna nemi um 27 milljörðum króna á árunum 2023 og 2024. Á dögunum var ákveðið að veita um 470 milljóna króna fjárveitingu úr almennum varasjóði til almannavarnardeildar Ríkilögreglustjóra vegna búnaðar sem ætlaður er til kælingar á hrauni við Grindavík, Svartsengi og á öðrum stöðum þar sem varnargarðar eru ekki til staðar eða myndu ekki duga til að stöðva eða beina hraunflæði frá mikilvægum innviðum.

Tafla yfir kostnað sem sýnir helstu aðgerðir og fjárheimildir

Við þetta bætist framlag ríkissjóðs vegna kaupa Þórkötlu á íbúðarhúsnæði í Grindavík, en það nemur alls um 51,5 ma.kr. Alls er því áætlaður stuðningur ríkissjóðs við Grindavík árin 2023 og 2024 um 80 milljarðar króna. Frekari útgjöld vegna jarðhræringanna gætu fallið til síðar eftir því hvernig mál þróast.