4,4 miljónir farþega árið 2025

Á blaðamannafundi Í dag kynnti Flugstöð Leifs Eiríkssonar hf. tillögur að framtíðarþróun og uppbyggingu mannvirkja félagsins. Enn fremur voru tillögur að landnýtingu á flugvallarsvæðinu kynntar. Þar kom fram að fjöldi farþega árlega muni hækka úr 1,4 milljónum og upp í 4.4 milljónir farþega árið 2025.Breska fyrirtækið BAA plc., sem hefur verulega reynslu af þróun, rekstri og uppbyggingu flugvalla og flugstöðva beggja vegna Atlantshafsins, vann tillögu að skipulagi vegna fyrirhugaðrar framtíðaruppbyggingar. Verkefni BAA fól í sér mælingar á öllum helstu rekstrarþáttum flugstöðvarinnar og þjónustu við farþega auk þess sem afkastageta flugstöðvarinnar var metin. Til að meta framtíðarþörf fyrir uppbyggingu mannvirkja félagsins gerði BAA spá um þróun farþegafjölda næstu 25 árin. Við gerð spárinnar gengu skipulagssérfræðingar BAA út frá hagvexti á Íslandi, fargjöldum,
markaðssókn og vinsældum Íslands sem ferðamannalands. Í spánni er gert ráð fyrir að heildarfarþegafjöldi verði kominn í 2.8 milljónir árið 2015
og um 4.4 milljónir árið 2025. Til samanburðar var farþegafjöldinn á síðasta ári um 1.4 milljónir.

Gangi áætlanir næstu 25 ára eftir má gera ráð fyrir að fjárfestingar verði umtalsverðar. Í kostnaðarmati BAA er gengið út frá því að
fjárfestingar í flugvallarmannvirkjum, landgöngum og athafnasvæðum í kringum flugstöðina, ásamt stækkun og breytingum á flugstöðinni geti
orðið á bilinu 25-30 milljarðar króna.Til viðbótar daglegum störfum á flugstöðvarsvæðinu, fylgja slíkum fjárfestingum mörg sérhæfð störf sem
þarf að sinna. Í dag starfa um 1.800 manns á flugstöðvarsvæðinu, en á næstu 25 árum getur þessi tala hugsanlega þrefaldast. Þannig munu meira
en 5.000 manns starfa á svæðinu að 25 árum liðnum ef forsendur farþegaspánna standast. Það er því mikið hagsmunamál að Flugstöð Leifs
Eiríkssonar hf., fái tækifæri til að þróast eftir kröfum atvinnugreinarinnar. Kröfur um stækkun, aukið öryggi, þjónustu, hraða og
hagkvæmni eru þeir þættir sem skipta atvinnugreinina mestu máli. Til að svo geti orðið þarf að tryggja sveigjanlegt athafnarými og lagalega
umgjörð sem hentar best framtíðarþróun og uppbyggingu á Flugstöðvarsvæðinu.

BAA vann tillögurnar út frá þeirri forsendu að stærð og umfang flugstöðvarinnar ætti að ráðast af hámarksfjölda farþega á mestu álagstímum en ekki af fjölda farþega á ári. Við gerð tillögunnar var gengið út frá því að í 95% tilfella verði hægt að anna þeirri farþegaumferð sem gert er ráð fyrir. Tillaga BAA gengur út frá því að endurhaga þurfi uppsetningu á afgreiðslusvæðum innan flugstöðvarinnar.Jafnframt þurfi að gera ráð fyrir nægu landrými til að geta haldið áfram stækkun svæðisins um ókomna framtíð. Þá gerir tillaga þeirra einnig ráð fyrir öðrum byggingum sem þjónusta flugstöðvar og flugvelli s.s.bílastæðum, bílageymslum, hótelum, og skrifstofubyggingum. Loks er gert ráð fyrir sérstakri framtíðar flutningaleið til og frá flugstöðinni,
hvort sem notast verður við lestar eða annan samgöngumáta hentugum fyrir flutning farþega á milli þéttbýlla staða og flugstöðvarinnar.

Hvað landrými varðar er fjöldi flugvélastæða sú skorða sem ræður mestu. Fram til ársins 2025 má gera ráð fyrir að viðbótarþörf verði fyrir allt að 27
ný flugvélastæði, auk landsvæðis fyrir vegi, bílastæði og þjónustubyggingar fyrir farþegaafgreiðslu. BAA byggði tillögu sína á upplýsingum úr flugupplýsingakerfi Keflavíkurflugvallar auk upplýsinga frá ýmsum aðilum sem tengjast ferðamálum og hagstjórn. Stjórn Flugstöðvar Leifs Eiríkssonar íhugar að gera tillögurnar að stefnu sinni og mun á næstunni taka ákvörðun þar að lútandi.

Samningar um verslunarrekstur, veitingasölu og ýmsa aðra þjónustu í Flugstöð Leifs Eiríkssonar renna út um næsta áramót. Til að efla
þjónustu við farþega og auka heildartekjur og afrakstur verslunar- og þjónustusvæðis flugstöðvarinnar, bæði innan fríverslunarsvæðsins og utan
þess, hefur verið ákveðið að efna til forvals á rekstraraðilum á brottfarasvæði flugstöðvarinnar semog um ýmsa þjónustuþætti utan
fríverslunarsvæðisins. Markmið forvalsins er að kalla eftir nýjum hugmyndum varðandi rekstur í flugstöðinni og gera um leið núverandi
rekstraraðilum og öðrum áhugasömum kleift að koma nýjum hugmyndum á framfæri.