384 milljón kr. rekstrarafgangur hjá Reykjanesbæ

Reykjanesbær skilar 384,3 milljón króna hagnaði samkvæmt endurskoðuðum ársreikningi fyrir árið 2005. Þetta er viðsnúningur upp á 594 milljónir kr. frá fyrra ári. Bæjarsjóður skilar 87,3 milljón kr. hagnaði, sem er 340 milljón kr. viðsnúningur. Þetta kemur fram í tilkynningu frá Reykjanesbæ.

Ársreikningurinn verður kynntur á fundi bæjarstjórnar Reykjanesbæjar á morgun kl. 17:00.

Þessi sterka staða hefur náðst þrátt fyrir að ekki sé innheimt hámarks útsvar í Reykjanesbæ og að tekjur af fasteignagjöldum á íbúa séu talsvert lægri en í stærstu sveitarfélögum á Íslandi. Heildartekjur Reykjanesbæjar nema rúmum 5 milljörðum kr. en rekstrargjöld og fjármagnsliðir nema rúmum 4,6 milljörðum kr.

Skatttekjur hækka um 11% á milli ára og heildartekjur um 19%. Rekstrargjöld hækka um 5% en þar vega laun þyngst en þau hækka um 13% frá fyrra ári.

Haft er eftir Árna Sigfússyni bæjarstjóra að þessi niðurstaða ársreiknings sé sérstaklega ánægjuleg með tilliti til þeirrar miklu uppbyggingar sem nú á sér stað í bæjarfélaginu og kostnaðar sem af henni hlýst, mikillar fjölgunar nemenda í grunn- og leikskólum, launahækkana vegna kjarasamninga og hærri greiðslna vegna lífeyrisskuldbindinga.

Á sl. fjórum árum hefur verið gerð gangskör í endurreikningi lífeyrisskuldbindinga og hafa tæplega 1000 milljónir kr. verið færðar á rekstur. Þá voru stórframkvæmdir við Hafnargötu að mestu leyti færðar til gjalda á rekstrarreikning.

Eiginfjárhlutfall bæjarsjóðs nemur 42,32% og veltufjárhlutfall er 1,7. Eignir samstæðu nema nú 11,9 milljörðum kr. en skuldir tæpum 8,4 milljörðum kr. Eignir bæjarsjóðs nema tæpum 8,5 milljörðum kr. en skuldir tæplega 4,9 milljörðum kr. Frá 2002 hafa eignir samstæðu aukist um 486 milljónir kr. en skuldir um 62 milljónir kr. Eignir umfram skuldir hafa því aukist um 424 milljónir kr. á tímabilinu.

Í Reykjanesbæ eru nú í byggingu um 820 íbúðir og nýr grunnskóli tók til starfa s.l. haust auk stækkunar leikskóla. Lokið er úthlutun lóða fyrir rúmlega 600 íbúðir til viðbótar í Dalshverfi og Ásahverfi sem verða að mestu byggingarhæfar í vor og sumar. Verið er að skipuleggja nýtt hverfi, Stapahverfi, í framhaldi af Dalshverfi. Í allt eru þetta rúmlega 1800 íbúðir sem hýsa munu um það bil 5.500 íbúa, segir í tilkynningu bæjarins.