22% verslana brutu lög um tóbaksvarnir

Heilbrigðiseftirlit Suðurnesja kannaði nýverið  hvernig ákvæðum um tóbaksvarnir um bann við sölu á tóbaki til unglinga yngri en 18 ára er framfylgt í verslunum á svæðinu. Könnunin fór þannig fram að  einstaklingar undir 18 ára aldri fóru  í verslanir og gerðu tilraunir til  kaupa á tóbaki. Í kjölfarið komu starfsmenn  embættisins og tilkynntu um könnunina  og niðurstöðu hennar í viðkomandi  verslun. Könnuð var sala á 32 útsölustöðum  sem hlotið hafa leyfi heilbrigðisnefndar  til tóbakssölu. Alls seldu 7 (22%) þessara staða tóbak til ungmenna yngri en 18 ára.
Þær verslanir sem seldu tóbak  í þessari könnun voru: Samkaup Grindavík, Samkaup Njarðvík,  Kasko Keflavík,  Sparkaup Sandgerði,  Biðskýlið Njarðvík, Olíufélagið  – Aðalstöðin og Ungó. Öllum verslunum var þann 24. nóvember  sl. sent bréf um niðurstöðu könnunarinnar. Þær verslanir sem gerst höfðu  brotlegar fengu jafnframt tilkynningu að til meðferðar væri að áminna þær  fyrir brot á tóbaksvarnalögum. Öllum var gefinn kostur á að  gera athugasemdir við bréf embættisins. Engar athugasemdir hafa  borist. Í  könnuninn var aldur afgreiðslufólks  einnig kannaður. Í einu tilviki reyndist afgreiðslumaður  ekki hafa náð 18 ára aldri og var það  í Kasko Keflavík.
Heilbrigðisnefnd Suðurnesja ákvað á síðasta fundi sínum að veita  Samkaup hf.  áminningu fyrir ítrekuð brot á tóbaksvarnalögum  í verslununum Kasko í Keflavík og  Sparkaup Sandgerði, segir á vef Heilbrigðiseftirlits Suðurnesja.